എൻഡോസൾഫാൻ ദുരിതബാധിതരെ തെരുവിലിറക്കരുത്–വി.ഡി. സതീശൻ

കാഞ്ഞങ്ങാട്: എൻഡോസൾഫാൻ ദുരിതബാധിതരുടെ ആവശ്യങ്ങൾ, പ്രത്യേകിച്ച് ചികിത്സ സൗകര്യങ്ങൾ അടിയന്തരമായി ഉറപ്പാക്കണമെന്ന് പ്രതിപക്ഷ നേതാവ് വി.ഡി. സതീശൻ. കാഞ്ഞങ്ങാട് അമ്പലത്തറയിൽ എൻഡോസൾഫാൻ ദുരിതബാധിതർക്കുവേണ്ടി പ്രവർത്തിക്കുന്ന സ്നേഹവീട്ടിൽ ദുരിതബാധിതരെ സന്ദർശിച്ചു സംസാരിക്കുകയായിരുന്നു പ്രതിപക്ഷ നേതാവ്.ദുരിതബാധിതരുടെ ഏതാവശ്യത്തിനും കൂടെയുണ്ടാവുമെന്ന്​ അദ്ദേഹം ഉറപ്പ് നൽകി. മുൻ ജില്ല കലക്ടർ ഡോ. സജിത് ബാബുവി‍െൻറ നിലപാടുകൾ ദുരിതബാധിതരുടെ പ്രശ്നങ്ങൾ കൂടുതൽ പ്രതിസന്ധിയിൽ എത്തിക്കുകയായിരുന്നുവെന്ന് രാജ്‌മോഹൻ ഉണ്ണിത്താൻ എം.പി പറഞ്ഞു. പുല്ലൂർ പെരിയ പഞ്ചായത്ത് പ്രസിഡൻറ്​ സി.കെ. അരവിന്ദൻ, മുനീസ അമ്പലത്തറ, ഡി.സി.സി പ്രസിഡൻറ്​ പി.കെ. ഫൈസൽ, കെ. കൊട്ടൻ എന്നിവർ സംസാരിച്ചു. എൻഡോസൾഫാൻ ദുരിതബാധിതരും അമ്മമാരും പ്രതിപക്ഷ നേതാവിനെ കാണാനെത്തി സങ്കടങ്ങൾ പറഞ്ഞു.