ഗ്രീഷ്മയുടെ അറസ്റ്റ് രേഖപ്പെടുത്തി; ഷാരോണിന്റെ വസ്ത്രങ്ങള് ഫൊറന്സിക് പരിശോധനയ്ക്ക്
തിരുവനന്തപുരം: ഷാരോണ് കൊലക്കേസില് കൂടുതല് തെളിവുകള് തേടി അന്വേഷണസംഘം. ഗ്രീഷ്മയുടെ വീട്ടില്പോയ ദിവസം ഷാരോണ് ധരിച്ച വസ്ത്രങ്ങള് ഹാജരാക്കാന് ക്രൈംബ്രാഞ്ച് നിര്ദേശം നല്കി. ഈ വസ്ത്രങ്ങള് ഫൊറന്സിക് പരിശോധനയ്ക്ക് അയക്കാനാണ് അന്വേഷണസംഘത്തിന്റെ നീക്കം.
കേസില് ഷാരോണിന്റെ കുടുംബാംഗങ്ങളുടെ മൊഴിയെടുക്കല് തിങ്കളാഴ്ച ഉച്ചയ്ക്ക് ശേഷവും തുടരുകയാണ്. എ.എസ്.പി. സുള്ഫിക്കറിന്റെ നേതൃത്വത്തിലുള്ള സംഘമാണ് നെയ്യാറ്റിന്കര ഡിവൈ.എസ്.പി. ഓഫീസില് ഇവരുടെ മൊഴി രേഖപ്പെടുത്തുന്നത്.
കൊലപാതകത്തില് ഗ്രീഷ്മയുടെ അമ്മയ്ക്കും അമ്മാവനും പങ്കുണ്ടെന്നാണ് ഷാരോണിന്റെ കുടുംബത്തിന്റെ പ്രധാന ആരോപണം. അമ്മയാണ് കഷായത്തില് കളനാശിനി കലര്ത്തിനല്കിയതെന്നും ഇവര് ആരോപിച്ചിരുന്നു. ഇക്കാര്യങ്ങളെല്ലാം ക്രൈംബ്രാഞ്ച് സംഘത്തിന് മുന്നില് കുടുംബം വീണ്ടും ഉന്നയിച്ചു. ഒക്ടോബര് 14-ാം തീയതി ഗ്രീഷ്മയുടെ വീട്ടില്പോയപ്പോള് ഷാരോണ് കൊണ്ടുപോയിരുന്ന ബാഗും കുടുംബം പോലീസ് സ്റ്റേഷനില് എത്തിച്ചിരുന്നു