ഗാസ സിറ്റിയിലെ ഏക വൈദ്യുതി പ്ലാന്റിന്റെ പ്രവര്ത്തനം മണിക്കൂറുകള്ക്കുള്ളില് നിലയ്ക്കും, മേഖലയില് പൂര്ണമായി വൈദ്യുതി മുടങ്ങും; ആശുപത്രികള് അടക്കം ഇരുട്ടിലാകും
ജറുസലേം: ഗാസ സിറ്റിയിലെ ഏക വൈദ്യുതി പ്ലാന്റിന്റെ പ്രവര്ത്തനം മണിക്കൂറുകള്ക്കുള്ളില് നിലയ്ക്കുമെന്ന് ഗാസയിലെ പവര് അതോറിറ്റി. ഇസ്രയേല് വൈദ്യുതി വിതരണം നിര്ത്തിയ പശ്ചാത്തലത്തില്, മേഖലയില് പൂര്ണമായി വൈദ്യുതി മുടങ്ങുമെന്നും അതോറിറ്റി അറിയിച്ചു. ഗാസയിലെ വൈദ്യുതി സമ്ബൂര്ണമായി വിച്ഛേദിക്കുമെന്ന് ഇസ്രയേല് അറിയിച്ചിരുന്നു. ഗാസയിലേക്കുള്ള എല്ലാ അതിര്ത്തികളും അടച്ചിരിക്കുന്ന സാഹചര്യത്തില്, പവര് പ്ലാന്റിലേക്കും ആശുപത്രികള് അടക്കമുള്ള സംവിധാനങ്ങള് ആശ്രയിക്കുന്ന ജനറേറ്ററുകളിലേക്കും ഇന്ധനം എത്തിക്കാന് സാധ്യമല്ല. അതേസമയം, ഗാസ അതിര്ത്തിയില് ഇസ്രയേല് വന്തോതില് സൈനിക വിന്യാസം നടത്തിയിട്ടുണ്ട്. മണിക്കൂറുകള്ക്കുള്ളില് ഗാസയിലേക്ക് കരമാര്ഗമുള്ള ആക്രമണം ആരംഭിക്കും എന്നാണ് സൂചന. ഗാസയില് കണ്ണുംപൂട്ടി ആക്രമണം നടത്താന് ഇസ്രയേല് പ്രതിരോധ മന്ത്രി സൈന്യത്തോട് ആവശ്യപ്പെട്ടതിന് പിന്നാലെയാണ് സൈനിക നീക്കം.