മുംബൈയിൽ സ്കൂൾ ബസിനു മുകളിൽ മരം വീണ് വിദ്യാർഥിക്ക് ദാരുണാന്ത്യം; നിരവധി കുട്ടികൾക്ക് ഗുരുതര പരുക്ക്

മുംബൈ: കനത്ത മഴയിൽ മുംബൈയിലെ ചെമ്പൂരിൽ സ്കൂൾ ബസിനു മുകളിലേക്ക് മരം വീണ് വിദ്യാർഥി മരിച്ചു. അപകടത്തിൽ പത്തോളം വിദ്യാർഥികൾക്ക് പരുക്കേറ്റു. ചെമ്പൂരിലെ റോഡ് നമ്പർ 11 ൽ ഇന്ന് ഉച്ചയോടെയായിരുന്നു സംഭവം. അപകടസമയത്ത് 13 കുട്ടികൾ ബസിനുള്ളിൽ ഉണ്ടായിരുന്നു. പരുക്കേറ്റ കുട്ടികളിൽ ചിലരെ തൊട്ടടുത്തുള്ള ജെയിൻ ആശുപത്രിയിൽ പ്രവേശിപ്പിച്ചു. ഇതിൽ ചിലരുടെ നില ഗുരുതരമാണെന്നാണ് വിവരം. നാല് കുട്ടികൾ നിലവിൽ സെൻ ആശുപത്രിയിൽ ചികിത്സയിലാണ്.

അതേസമയം, തകർന്ന ബസിനുള്ളിൽ ഒരു കുട്ടി കൂടി കുടുങ്ങിക്കിടക്കുന്നതായാണ് റിപ്പോർട്ട്. ഈ കുട്ടിയെ പുറത്തെടുക്കാൻ അഗ്നിശമനസേനയും രക്ഷാപ്രവർത്തകരും മരം മുറിച്ചുമാറ്റിക്കൊണ്ട് തീവ്രശ്രമം തുടരുകയാണ്. മേഖലയിലെ അപകടാവസ്ഥയിലുള്ള മരങ്ങൾ മുറിച്ചു കളയുകയോ വെട്ടിമാറ്റുകയോ ചെയ്യണമെന്ന് ആവശ്യപ്പെട്ട് മുൻസിപ്പൽ കോർപ്പറേഷനു നിരവധി തവണ പരാതി നൽകിയിരുന്നതായി പ്രദേശവാസികൾ ആരോപിച്ചു. മുൻപും സമാനമായ രീതിയിൽ ഇവിടെ മരങ്ങൾ വീണിട്ടുണ്ടെന്നും, തുടർച്ചയായ മുന്നറിയിപ്പുകൾ നൽകിയിട്ടും അധികൃതർ യാതൊരു നടപടിയും സ്വീകരിച്ചില്ലെന്നും പ്രദേശവാസികൾ കുറ്റപ്പെടുത്തി.

അപകടത്തിനു പിന്നാലെ, മുംബൈയിലും പ്രാന്തപ്രദേശങ്ങളിലും ഇന്ന് കനത്ത മഴയ്ക്കും ഇടിമിന്നലിനും സാധ്യതയുണ്ടെന്ന് കാലാവസ്ഥ വകുപ്പ് പ്രവചിച്ചു. ഇത് നിലവിലെ രക്ഷാപ്രവർത്തനത്തെ ബാധിക്കുമോ എന്ന ആശങ്കയും നിലനിൽക്കുന്നുണ്ട്.