കൊച്ചി മെട്രോയില് 20 രൂപയ്ക്ക് പരിധിയില്ലാതെ യാത്ര; വനിതാ ദിനത്തില് വിവിധ പദ്ധതികളൊരുക്കി കൊച്ചി മെട്രോ
കൊച്ചി: മാര്ച്ച് എട്ട് അന്താരാഷ്ട്ര വനിതാദിനത്തില് സ്ത്രീകള്ക്ക് ഇളവുകള് പ്രഖ്യാപിച്ച് കൊച്ചി മെട്രോ.
കൊച്ചി മെട്രോയുടെ ഏത് സ്റ്റേഷനില് നിന്നും സ്ത്രീകള്ക്ക് ഏത് ദൂരവും എത്ര തവണ വേണമെങ്കിലും വെറും ഇരുപത് രൂപയ്ക്ക് യാത്ര ചെയ്യാം. കൂടാതെ, കഴിഞ്ഞ ഒരു വര്ഷത്തിനിടെ ഏറ്റവുമധികം തവണ കൊച്ചി മെട്രോയില് യാത്ര ചെയ്ത മൂന്ന് വനിതകളെ കെഎംആര്എല് എംഡി ശ്രീ. ലോക്നാഥ് ബെഹ്റ ഉച്ച്ക്ക് 12 മണിക്ക് കലൂര് മെട്രോ സ്റ്റേഷനില് വച്ച് ആദരിക്കും.
ഇതിനു പുറമേ കൊച്ചി മെട്രോയുടെ വിവിധ സ്റ്റേഷനുകളില് സ്ത്രീകള്ക്കായി പരിപാടികളും മെഡിക്കല് ക്യാംപുകളും കൊച്ചി മെട്രോ ഒരുക്കുന്നു. മെട്രോ യാത്രക്കാരായ സ്ത്രീകള്ക്ക് അത്യാവശ്യ ഘട്ടങ്ങളില് ഉപയോഗിക്കുന്നതിനായി നാല് മെട്രോ സ്റ്റേഷനുകളില് നാപ്കിന് വെന്ഡിംഗ് മെഷീനുകള് വനിതാ ദിനത്തില് ഉദ്ഘാടനം ചെയ്യും. ഇടപ്പള്ളി, കലൂര്, മഹാരാജാസ്, എറണാകുളം സൗത്ത് എന്നീ സ്റ്റേഷനുകളിലാണ് ഈ സേവനം ലഭിക്കുക. ഈ വെന്ഡിംഗ് മെഷീനുകളില് നിന്ന് സ്ത്രീകള്ക്ക് സൗജന്യമായി നാപ്കിനുകള് ലഭിക്കും
കലൂര് മെട്രോ സ്റ്റേഷനില് ഉച്ചക്ക് 12.15ന് കെഎംആര്എല് എംഡി ശ്രീ. ലോക്നാഥ് ബെഹ്റ നാപ്കിന് വെന്ഡിംഗ് മെഷീനുകള് ഉദ്ഘാടനം ചെയ്യും. നെക്സോറ അക്കാദമിയുമായി ചേര്ന്നാണ് കൊച്ചി മെട്രോ ഈ സൗകര്യം ഒരുക്കുക. കംപ്യൂട്ടറിന്റെ സി.പി.യു പോലുള്ള ഇലക്ട്രോണിക് വേസ്റ്റുകളും റീസൈക്കിള് ചെയ്ത അലൂമിനിയം, പ്ലാസ്റ്റിക്ക് വേസ്റ്റുകളും ഉപയോഗിച്ച് നെക്സോറ അക്കാദമിയിലെ വിദ്യാര്ത്ഥികളാണ് ചെലവ് കുറഞ്ഞ നാപ്കിന് വെന്ഡിംഗ് മെഷീനുകള് നിര്മ്മിച്ചിരിക്കുന്നത്.
സ്ത്രീകള്ക്കായി സൗജന്യ ബോണ് ഡെന്സിറ്റി പരിശോധയും വനിതാ ദിനത്തില് മുട്ടം, ഇടപ്പള്ളി, എം.ജി.റോഡ്, വൈറ്റില സ്റ്റേഷനുകളില് ഒരുക്കിയിട്ടുണ്ട്. ക്രാഫ്റ്റ് ഫെര്ട്ടിലിറ്റി സെന്ററിന്റെയും മേയര് വിറ്റബയോട്ടിക്സിന്റെയും സഹകരണത്തോടെ രാവിലെ 11 മുതല് വൈകിട്ട് 7 മണിവരെ നടക്കുന്ന മെഡിക്കല് ക്യാംപിന്റെ ഉദ്ഘാടനം ഉച്ചക്ക് 1.15ന് കെഎംആര്എല് എം.ഡി ശ്രീ. ലോക്നാഥ് ബെഹ്റ നിർവ്വഹിക്കും.
ഉച്ചക്ക് 2.30ന് കലൂര് മെട്രോ സ്റ്റേഷനില് കൊച്ചിന് ബിസിനസ് സ്കൂളിലെ വിദ്യാര്ത്ഥികള് ഫ്ലാഷ് മോബ് സംഘടിപ്പിക്കും. എറണാകുളം സൗത്ത് മെട്രോ സ്റ്റേഷനില് നിന്നും 2.30ന് സ്ത്രീകളുടെ ജീവിതത്തിലെ വിവിധ ഘട്ടങ്ങള് ഉള്പ്പെടുത്തിയുള്ള ഫാഷന് ഷോയും മൈമും ആരംഭിക്കും.