കാവ്യയെ വീണ്ടും ചോദ്യം ചെയ്യാനുറപ്പിച്ച് പോലീസ്; കണ്ടെടുത്തത് നിര്ണായക തെളിവുകള്
കൊച്ചി: നടിയെ ആക്രമിച്ച ദൃശ്യങ്ങള് ദിലീപിന്റെ കൈവശം ഉണ്ടെന്ന സംവിധായകന് ബാല ചന്ദ്രകുമാറിന്റെ വെളിപ്പെടുത്തല് സ്ഥിരീകരിക്കുന്ന വസ്തുതകള് ലഭിച്ചിട്ടുണ്ടെന്ന് ക്രൈംബ്രാഞ്ച്. ഫോണുകളിലെ വിവരങ്ങള് മായ്ച്ചുകളയാനായി അയച്ച മുംബൈയിലെ ലാബ് സിസ്റ്റംസ് ഇന്ത്യ ലിമിറ്റഡില്നിന്ന് പിടിച്ചെടുത്ത ഹാര്ഡ് ഡിസ്കില് നിന്നാണ് ഈ വിവരങ്ങള് ലഭിച്ചത്. ദിലീപും സഹോദരീഭര്ത്താവ് സൂരജും ഉപയോഗിച്ചിരുന്ന ഫോണുകളില്നിന്ന് ലഭിച്ച പുതിയ വസ്തുതകളില് നിന്നാണ് ഈ വിവരങ്ങള് കിട്ടിയത്.
ദിലീപിന്റെ ഭാര്യ കാവ്യ ചെന്നൈയിലാണെന്നാണ് വിവരം. ചെന്നൈയില്നിന്ന് തിരിച്ചെത്തിയാലുടന് കാവ്യയെ ചോദ്യംചെയ്യണ്ടതുണ്ടെന്ന നിലപാടിലാണ് പോലീസ്. ബാലചന്ദ്രകുമാറിന്റെ വെളിപ്പെടുത്തല് സാധൂകരിക്കുന്ന കൂടുതല് തെളിവുകള് ലഭിച്ചിട്ടുണ്ട്. ഈ തെളിവുകളില്നിന്ന് ബാലചന്ദ്രകുമാര് വിശ്വസിക്കാനാകുന്ന സാക്ഷിയാണെന്ന് ക്രൈംബ്രാഞ്ച് വ്യക്തമാക്കുന്നു.
ദിലീപ് ഹൈക്കോടതിയില് സമര്പ്പിച്ച ആറ് മൊബൈല് ഫോണുകളില് നിന്ന് ലഭിച്ചത് ആയിരക്കണക്കിന് രേഖകളാണ്. ഫോണിലെ സംഭാഷണങ്ങള് മാത്രം 200 മണിക്കൂറിലേറെ വരും.