പേവിഷബാധ പ്രതിരോധ വാക്സിനുകള് ഗുണനിലവാരമുള്ളത്, ആശങ്ക വേണ്ടെന്ന് മന്ത്രി വീണാ ജോര്ജ്
തിരുവനന്തപുരം : പരിശോധനയ്ക്കയച്ച പേവിഷബാധ പ്രതിരോധ വാക്സിനുകള് ഗുണനിലവാരമുള്ളതാണെന്ന് കേന്ദ്ര ഡ്രഗ്സ് ലാബ് സര്ട്ടിഫെെ ചെയ്തതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. ആന്റി റാബിസ് വാക്സിന് ഗുണനിലവാരമുള്ളതാണെന്ന് നേരത്തെ കസോളിയിലെ കേന്ദ്ര ഡ്രഗ്സ് ലാബ് സര്ട്ടിഫെെ ചെയ്തിരുന്നു. വാക്സിനെടുത്ത ചിലരില് പേവിഷബാധ മരണം ഉണ്ടായ സാഹചര്യത്തില് പൊതു ആശങ്ക പരിഹരിക്കുന്നതിന് വേണ്ടിയാണ് വീണ്ടും വാക്സിന് കേന്ദ്ര ഡ്രഗ്സ് ലാബില് പരിശോധനയ്ക്കയച്ചത്. അടുത്തിടെ കേന്ദ്ര ലാബിലേയ്ക്കയച്ച ഇമ്മുണോഗ്ലോബുലിനും ഗുണനിലവാരമുള്ളതായി സര്ട്ടിഫെെ ചെയ്തു.
ഇതോടെ പേവിഷബാധ പ്രതിരോധത്തിനുപയോഗിക്കുന്ന വാക്സിനും ഇമ്മുണോഗ്ലാബുലിനും സ്റ്റാന്ഡേര്ഡ് ക്വാളിറ്റിയാണെന്ന് കേന്ദ്ര ഡ്രഗ്സ് ലാബ് സര്ട്ടിഫെെ ചെയ്തു. പേവിഷബാധയ്ക്കെതിരെയുള്ള ഏറ്റവും വലിയ പ്രതിരോധമാണ് ആന്റി റാബിസ് വാക്സിനും ഇമ്മുണോഗ്ലോബുലിനും. അതിനാല് തന്നെ ആശങ്കപ്പെടേണ്ടതില്ലെന്ന് മന്ത്രി വ്യക്തമാക്കി.കേന്ദ്ര ഡ്രഗ്സ് ലബോറട്ടറിയില് പരിശോധിച്ച് ഗുണനിലവാര സര്ട്ടിഫിക്കറ്റ് ലഭ്യമായ വാക്സിനും സെറവുമാണ് നായ്ക്കളില് നിന്ന് കടിയേറ്റ് ആശുപത്രിയില് എത്തിയവര്ക്കും മരണമടഞ്ഞ 5 പേര്ക്കും നല്കിയത്. വാക്സിന് നല്കിയിട്ടും പേവിഷബാധ മരണം സംഭവിച്ചത് സംബന്ധിച്ച് പൊതുജനങ്ങളില് ആശങ്ക പരിഹരിക്കാന് കൂടിയാണ് രണ്ട് ബാച്ച് നമ്ബരിലുള്ള ഇമ്മുണോഗ്ലോബുലിനും ഒരു ബാച്ച് നമ്ബരിലുള്ള ആന്റി റാബിസ് വാക്സിനും പരിശോധനയ്ക്കായി കസോളിയിലെ കേന്ദ്ര ലാബോറട്ടറിയില് നേരിട്ടയച്ചത്. പരിശോധനയില് ഇവ രണ്ടും സ്റ്റാന്ഡേര്ഡ് ക്വാളിറ്റി ആണെന്ന് സര്ട്ടിഫെെ ചെയ്തിട്ടുണ്ട്.