തിരഞ്ഞെടുപ്പ് കമ്മീഷണറായി അരുണ് ഗോയലിന്റെ നിയമനം: ഫയലുകള് ഹാജരാക്കാന് സുപ്രീം കോടതി നിര്ദേശം
ന്യൂ ഡല്ഹി: വിരമിച്ച പഞ്ചാബ് കേഡര് ഐഎഎസ് ഉദ്യോഗസ്ഥന് അരുണ് ഗോയലിനെ തിരഞ്ഞെടുപ്പ് കമ്മീഷണര് പദവിയില് നിയമിച്ചതുമായി ബന്ധപ്പെട്ട എല്ലാ ഫയലുകളും ഹാജരാക്കാന് കേന്ദ്ര സര്ക്കാരിനോട് സുപ്രീം കോടതി നിര്ദേശിച്ചു. മുഖ്യ തെരഞ്ഞെടുപ്പ് കമ്മീഷണര്, തിരഞ്ഞെടുപ്പ് കമ്മീഷണര് എന്നിവരുടെ നിയമന നടപടി പരിഷ്കരിക്കണെമെന്ന് ആവശ്യപ്പെട്ടുള്ള ഹര്ജി ഭരണഘടന ബെഞ്ച് പരിഗണിക്കുന്നതിനിടെയായിരുന്നു കോടതിയുടെ നിര്ദേശം. നിയമനം ഒഴിവാക്കാമായിരുന്നവെന്നു ഭരണഘടന ബെഞ്ച് നിരീക്ഷിച്ചു.
അരുണ് ഗോയലിനെ നിയമിച്ചതുമായി ബന്ധപ്പെട്ട എല്ലാ ഫയലുകളും വ്യാഴാഴ്ച ഹാജരാക്കാനാണ് സുപ്രീം കോടതി ഭരണഘടനാ ബെഞ്ച് നിര്ദേശിച്ചിരിക്കുന്നത്. നിയമന പ്രക്രിയ എങ്ങനെയെന്ന് മനസിലാക്കാനാണ് ഫയലുകള് പരിശോധിക്കുന്നതെന്നും ബെഞ്ച് വ്യക്തമാക്കി. നിയമനത്തിന്റെ നടപടിക്രമങ്ങള് എല്ലാം സര്ക്കാര് അവകാശപ്പെടുന്നത് പോലെ ശരിയായ രീതിയിലാണെങ്കില് ഭയപ്പെടാന് ഇല്ലെന്ന് ഭരണഘടന ബെഞ്ചിന് നേതൃത്വം നല്കിയ ജസ്റ്റിസ് കെ.എം ജോസഫ് ചൂണ്ടിക്കാട്ടി. നിയമനം നടത്തുന്നതിന് കോടതിയുടെ വിലക്ക് ഉണ്ടായിരുന്നില്ലെന്ന് അറ്റോര്ണി ജനറല് ആര്. വെങ്കിട്ട രമണി വാദിച്ചു