ജില്ലയിൽ റേഷൻ മുൻഗണനാ ലിസ്റ്റിൽ ഉൾപ്പെടുത്താനുള്ള അപേക്ഷയിൽ 2065 അപേക്ഷകർക്ക് നടപടി -മന്ത്രി

പൊയിനാച്ചി: ജില്ലയിൽ ലോക്ഡൗൺ കാലത്ത് റേഷൻ മുൻഗണനാവിഭാഗത്തിൽ ഉൾപ്പെടുത്താൻ വിവിധ താലൂക്കുകളിൽ ലഭിച്ച 2065 അപേക്ഷകളിൽ അടിയന്തര നടപടി സ്വീകരിച്ചുവരുന്നതായി ഭക്ഷ്യ-പൊതുവിതരണ മന്ത്രി ജി.ആർ. അനിൽ നിയമസഭയിൽ എം. രാജഗോപാലൻ എം.എൽ.എ.യെ അറിയിച്ചു. മുൻഗണനാവിഭാഗത്തിൽ ഉൾപ്പെടുത്താൻ അപേക്ഷ സമർപ്പിച്ച ഗുരുതര രോഗബാധിതരായ അംഗങ്ങളുള്ള 190 കുടുംബങ്ങളെ പ്രാഥമികപട്ടികയിൽ ഉൾപ്പെടുത്തിയിട്ടുണ്ട്. മുൻഗണനാവിഭാഗത്തിൽ ഒഴിവുവരുന്ന മുറയ്ക്ക് അർഹരായ മുഴുവൻ അപേക്ഷകരെയും പട്ടികയിൽ ഉൾപ്പെടുത്താൻ നടപടി സ്വീകരിക്കുമെന്ന് മന്ത്രി വ്യക്തമാക്കി.