കേരളീയത്തിന്റെ ജനപങ്കാളിത്തം പ്രതിപക്ഷത്തെ ഭയപ്പെടുത്തുന്നു; ശോഭ കെടുത്താന് പാഴ്ശ്രമം- ശിവന്കുട്ടി
തിരുവനന്തപുരം: കേരളീയത്തിന്റെ ജനപങ്കാളിത്തം പ്രതിപക്ഷത്തെ ഭയപ്പെടുത്തുന്നുവെന്ന് പൊതുവിദ്യാഭ്യാസ- തൊഴില് മന്ത്രിയും കേരളീയം സംഘാടകസമിതി ചെയര്മാനുമായ വി. ശിവന്കുട്ടി. കേരള ചരിത്രത്തിലെ ഏറ്റവും മികച്ച ഉദ്ഘാടനച്ചടങ്ങാണ് കേരളീയത്തിന്റേത്. ആയിരക്കണക്കിന് ആളുകളാണ് ഉദ്ഘാടനച്ചടങ്ങില് പങ്കെടുത്തതെന്നും വി. ശിവന്കുട്ടി വാര്ത്താക്കുറിപ്പില് അവകാശപ്പെട്ടു. ഇന്ത്യയിലെ തന്നെ ഏറ്റവും മികച്ച സിനിമാതാരങ്ങളായ കമല്ഹാസന്, മമ്മൂട്ടി, മോഹന്ലാല്, ശോഭന തുടങ്ങിയവരും ഉദ്ഘാടന ചടങ്ങില് പങ്കെടുത്തു. കേരള ചരിത്രത്തെ രേഖപ്പെടുത്തുന്നതും വര്ത്തമാനകാല കേരളത്തെ വിശദീകരിക്കുന്നതും ഭാവി കേരളത്തെ ചൂണ്ടിക്കാണിക്കുന്നതുമായ നിരവധി പരിപാടികള് കേരളീയത്തോട് അനുബന്ധിച്ച് നടത്തുന്നുണ്ട്. കവടിയാര് മുതല് കിഴക്കേകോട്ട വരെ 42 വേദികളിലായാണ് കേരളീയം അരങ്ങേറുന്നത്. സെമിനാറുകള്, ഫിലിം ഫെസ്റ്റ്, പ്രദര്ശനങ്ങള്, കലാപരിപാടികള്, ഫുഡ് ഫെസ്റ്റ്, ഫ്ളവര്ഷോ, ട്രേഡ് ഫെയര്, ബി-ടു-ബി മീറ്റുകള്, ദീപാലങ്കാരം എന്നിവ കേരളീയത്തിന്റെ മാറ്റ് കൂട്ടുന്നുണ്ടെന്നും അദ്ദേഹം പറഞ്ഞു. ‘വലിയ ജനപ്രവാഹം കേരളീയത്തിലേക്ക് ഉണ്ടാകും എന്ന് ബി.ജെ.പിയും കോണ്ഗ്രസും ഭയക്കുന്നു. കേരളീയം ഉദ്ഘാടനവേദിയിലേക്ക് ബി.ജെ.പി. നടത്തിയ മാര്ച്ച് അത് കുറയ്ക്കുക എന്ന ലക്ഷ്യം വെച്ചാണ്. ബി.ജെ.പിയുടെ ഈ ആഗ്രഹം ഒരിക്കലും അനുവദിക്കില്ല’, വി. ശിവന്കുട്ടി പറഞ്ഞു. കേരളത്തിന്റെ മഹോത്സവം ആകുന്ന കേരളീയത്തില് അഴിമതി ആരോപിക്കുക എന്നതാണ് തുടക്കം മുതല് കോണ്ഗ്രസ് ചെയ്ത് വരുന്നത്. യാതൊരു തെളിവുമില്ലാതെ അനാവശ്യ ആരോപണങ്ങള് ഉന്നയിക്കുകയാണ് കോണ്ഗ്രസ്. കേരളീയത്തിന്റെ വന്വിജയം ഇരുകൂട്ടര്ക്കുമുള്ള കൃത്യമായ മറുപടിയാകുമെന്നും മന്ത്രി വി. ശിവന്കുട്ടി കൂട്ടിച്ചേര്ത്തു. .