ഡിജിറ്റൽ  അസറ്റുകൾക്ക് സാധ്യത വർധിക്കുന്നു; ഇന്ത്യയിലെ ക്രിപ്റ്റോ നിക്ഷേപകരിൽ കൂടുതലും യുവാക്കൾ; വനിതാ നിക്ഷേപകർ 9% മാത്രമെന്ന് റിപ്പോർട്ട്

രാജ്യത്ത് ക്രിപ്റ്റോ കറൻസികളിൽ കൂടുതലായും നിക്ഷേപം നടത്തിയിരിക്കുന്നത് യുവാക്കളാണെന്ന് ആഭ്യന്തര ക്രിപ്റ്റോ കറൻസി എക്സ്ചേഞ്ചായ കോയിൻ സ്വിച്ചിന്റെ കണക്കുകൾ. സ്ത്രീകളുടെ ക്രിപ്റ്റോ നിക്ഷേപം 9% എന്ന തോതിൽ കുറഞ്ഞു നിൽക്കുന്നതായും കണക്കുകളുണ്ട്​

Crypto Currency: ഇന്ത്യയിൽ, യുവാക്കളാണ് കൂടുതലായും ക്രിപ്റ്റോ നിക്ഷേപം നടത്തിയിരിക്കുന്നതെന്ന് കണക്കുകൾ. രാജ്യത്ത് 2023 അവസാനത്തെ കണക്കുകൾ പ്രകാരം 1.9 കോടി ക്രിപ്റ്റോ നിക്ഷേപകരാണുള്ളത്. ഏറ്റവുമധികം ക്രിപ്റ്റോ നിക്ഷേപകരുള്ളത് ഡൽഹിയിലാണെന്ന് ആഭ്യന്തര ക്രിപ്റ്റോ കറൻസി എക്സ്ചേഞ്ചായ കോയിൻ സ്വിച്ചിന്റെ കണക്കുകൾ വ്യക്തമാക്കുന്നു. രണ്ടാം സ്ഥാനത്ത് ബാംഗ്ലൂരാണ്. ഡൽഹിയിലും, ബാംഗ്ലൂരിലും യഥാക്രമം 8.8%, 8.3% എന്നിങ്ങനെയാണ് നിക്ഷേപകരുടെ തോത്.

​നിക്ഷേപകരിൽ കൂടുതലും യുവാക്കൾ​

ഇന്ത്യൻ ക്രിപ്റ്റോ നിക്ഷേപത്തിൽ സ്ത്രീകളുടെ പങ്കാളിത്തം 9% എന്ന തോതിൽ കുറഞ്ഞു നിൽക്കുന്നതായും റിപ്പോർട്ടുകൾ പുറത്തു വന്നിരുന്നു. രാജ്യത്തെ ക്രിപ്റ്റോ നിക്ഷേപകരിൽ 75% ആളുകളും 35 വയസ്സിനു താഴെ പ്രായമുള്ളവരാണ്. ആകെയുള്ള നിക്ഷേപകരിൽ 34.27% ആളുകൾ 26 വയസ്സിനു താഴെ പ്രായമുള്ളവരാണ്. 40.19% നിക്ഷേപകർ 26-35 പ്രായത്തിലുള്ളവരാണ്. 46 വയസ്സിനു മുകളിൽ പ്രായമുള്ള ക്രിപ്റ്റോ നിക്ഷേപകർ കേവലം 10.02% മാത്രമാണ്. ഉയർന്ന റിസ്കുള്ള ഈ അസറ്റ് ക്ലാസിൽ നിക്ഷേപിക്കാൻ കൂടുതൽ താല്പര്യം കാണിക്കുന്നത് യുവാക്കളാണെന്ന് ഈ കണക്കുകൾ വ്യക്തമാക്കുന്നു.

ഡൽഹി, ബാംഗ്ലൂർ നഗരങ്ങൾ കഴിഞ്ഞാൽ പിന്നീട് ഏറ്റവുമധികം നിക്ഷേപകരുള്ളത് മുംബൈ, ഹൈദരാബാദ് എന്നിവിടങ്ങളിൽ നിന്നാണ്. ഇതിൽ ആദ്യത്തെ മൂന്ന് നഗരങ്ങളിൽ മാത്രം ഇന്ത്യയിലെ 20% ക്രിപ്റ്റോ നിക്ഷേപകരുണ്ട്. ടയര‍് II നഗരങ്ങളായ പൂനെ, ജയ്പൂർ, ലഖ്നൗ എന്നിവിടങ്ങളിൽ നിന്നും കൂടുതൽ ക്രിപ്റ്റോ നിക്ഷേപകരുണ്ട്. ഇത്തരത്തിൽ രാജ്യത്തെ പ്രധാന നഗരങ്ങളിലെല്ലാം ഇപ്പോഴും ക്രിപ്റ്റോ കറൻസിയിൽ നിക്ഷേപം നടത്തിയിരിക്കുന്നവരുണ്ടെന്നത് വ്യക്തമാണ്.

ഇന്ത്യയിലെ ക്രിപ്റ്റോ നിക്ഷേപങ്ങളിൽ കൂടുതലും വലിയ ക്യാപ്പുള്ള ക്രിപ്റ്റോ കറൻസികളായ ബിറ്റ്കോയിൻ (Bitcoin) ഏതെർ എന്നിവയിലാണ്. ഈ കോയിനുകളുടെ മാർക്കറ്റ് ക്യാപ് 1 ബില്യൺ ഡോളറിലധികമാണ്. എന്നാൽ 2021-22 കാലയളവിൽ ക്രിപ്റ്റോ കറൻസിയോടുണ്ടായിരുന്ന നിക്ഷേപ താല്പര്യം കഴിഞ്ഞ വർഷം കുറഞ്ഞിട്ടുണ്ട്. അതേ സമയം ക്രിപ്റ്റോ കറൻസികൾ വളർച്ച നേടിയിട്ടുമുണ്ട്. 2023ൽ ബിറ്റ്കോയിൻ അതിന്റെ മൂല്യത്തിൽ 150% വരെ ഉയർച്ച കൈവരിച്ചിരുന്നു.

ഇന്ത്യൻ പോർട്ഫോളിയോകളിൽ മികച്ച പ്രകടനം നടത്തിയത് സൊളാനയാണ് (Solana). 2023ൽ 633% ഉയർച്ചയാണ് ഈ കോയിൻ നേടിയത്. പൊതുവെ വിശകലനം നടത്തുമ്പോൾ ക്രിപ്റ്റോ കറൻസികളുടെ മാർക്കറ്റ് വാല്യു 2022 ജൂണിൽ 1 ട്രില്യൺ ഡോളറുകൾ എന്ന നിലയുടെ താഴേക്കു പോയിരുന്നു. എന്നാൽ ഡിസംബറോടെ 1.5 ട്രില്യൺ ഉയർച്ച നേടുകയുമുണ്ടായി.