കിളികൊല്ലൂര് പൊലീസ് സ്റ്റേഷന് മര്ദ്ദനം; സൈന്യം ഇടപെടുന്നു, അന്വേഷണം തുടങ്ങി
കൊല്ലം: കിളികൊല്ലൂരിലെ പോലീസ് മര്ദനത്തില് സൈന്യം ഇടപെടുന്നു. കൊല്ലം കിളികൊല്ലൂരില് പൊലീസ് മര്ദനത്തില് പരിക്കേറ്റ സൈനികനായ വിഷ്ണുവിന്റെ വീട്ടില് പാങ്ങോട് സൈനിക ക്യാമ്ബിലെ ഉദ്യോഗസ്ഥരെത്തി വിവരങ്ങള് ശേഖരിച്ചു. പൊലീസില് നിന്നുണ്ടായ അക്രമ വിവരങ്ങളും വ്യാജ കേസിന്റെ വിശദാംശങ്ങളുമാണ് ഉദ്യോഗസ്ഥര് പ്രധാനമായും ചോദിച്ചറിഞ്ഞത്. ആഗസ്റ്റ് 25ന് വിഷ്ണുവിനെ അറസ്റ്റ് ചെയ്തെങ്കിലും സൈനിക ക്യാമ്ബില് പൊലീസ് അറിയിച്ചത് വൈകിയാണെന്നാണ് ലഭിക്കുന്ന വിവരം.
സൈനികനെ അറസ്റ്റ് ചെയ്താല് 24 മണിക്കൂറിനകം വിവരം സൈന്യത്തെ അറിയിക്കണമെന്നുള്ളപ്പോഴാണ് പൊലീസിന്റെ ഭാഗത്ത് നിന്നും വീഴ്ച്ചയുണ്ടായത്. ഒരു സൈനികന് അവധിയിലാണെങ്കിലും അയാള് ഡ്യൂട്ടിയിലാണെന്നാണ് സൈന്യം കണക്കാക്കുക. ഏതെങ്കിലും കേസില് സൈനികന് പ്രതിയായാല് സമീപത്തെ റെജിമെന്റിനെ അറിയിക്കുകയെന്നതാണ് നിയമം. അങ്ങനെ വരുമ്ബോള് തിരുവനന്തപുരം പാങ്ങോട് റെജിമെന്റിലാണ് അറിയിക്കേണ്ടത്. തുടര്ന്ന് മിലിട്ടറി പൊലീസ് കേസ് ഏറ്റെടുക്കുക എന്നതാണ് രീതി.
ഇക്കാര്യം സൈന്യത്തെ അറിയിക്കുന്നതില് പൊലീസിന് വീഴ്ചപറ്റി. കേസില് മര്ദനം ഉള്പ്പെടെയുണ്ടായ ശേഷമാണ് പാങ്ങോട് ഇക്കാര്യം അറിയിച്ചത്. ഇക്കാര്യങ്ങളെല്ലാം സൈന്യം പരിശോധിക്കും. അതേസമയം സൈനികനെ മര്ദ്ദിച്ചതില് പ്രതിരോധ മന്ത്രിക്ക് എന്.കെ പ്രേമചന്ദ്രന് എംപി വഴി പരാതി നല്കാനാണ് കുടുംബത്തിന്റെ തീരുമാനം.
അതേസമയം കിളികൊല്ലൂര് സ്റ്റേഷനില് സൈനികനായ വിഷ്ണുവിനെ എ.എസ്.ഐ മര്ദ്ദിക്കുന്ന ദൃശ്യങ്ങള് പുറത്തു വിട്ടതിന് പിന്നാലെ പൊലീസ് സേനക്കുള്ളില് ഭിന്നത. എ.എസ്.ഐ പ്രകാശ് ചന്ദ്രനെ മാത്രം കുറ്റക്കാരനാക്കി സി.ഐ അടക്കമുള്ള മറ്റ് പൊലീസുകാരെ സംരക്ഷിക്കാന് വേണ്ടി ഉന്നത ഉദ്യോഗസ്ഥരാണ് സിസിടിവി ദൃശ്യങ്ങള് പുറത്തുവിട്ടതെന്നാണ് ഒരു വിഭാഗം പൊലീസുകാരുടെ ആരോപണം. അതേസമയം സ്റ്റേഷനിലെ മുഴുവന് സിസിടിവി ദൃശ്യങ്ങളും നല്കണമെന്നാവശ്യപ്പെട്ട് വിഘ്നേഷ് ഇന്ന് കിളികൊല്ലൂര് പൊലീസ് സ്റ്റേഷനില് വിവരാവകാശ രേഖ സമര്പ്പിക്കും. മര്ദ്ദനവുമായി ബന്ധപ്പെട്ട ആഭ്യന്തര അന്വേഷണത്തില് ക്രൈംബ്രാഞ്ച് ഉദ്യോഗസ്ഥര് ഇന്ന് യുവാവിന്റെ വീട്ടിലെത്തി മൊഴി രേഖപ്പെടുത്തും.
: കിളികൊല്ലൂര് മര്ദനം, ന്യായീകരിക്കാന് ശ്രമിച്ച് പൊലീസ്, എസ്ഐ അനീഷിന്റേതെന്ന് പറയുന്ന വോയിസ് ക്ലിപ്പ് പുറത്ത്